Psalms 2

Mfalme Aliyechaguliwa Na Mungu

1 ^aKwa nini mataifa wanashauriana kufanya mabaya,
na kabila za watu kula njama bure?

2 ^{b c}Wafalme wa dunia wanajipanga
na watawala wanajikusanya pamoja
dhidi ya Bwana
na dhidi ya Mpakwa Mafuta wake.

3 ^dWanasema, “Tuvunje minyororo yao
na kuvitupilia mbali vifungo vyao.”

4 ^eYeye atawalaye mbinguni hucheka,
Bwana huwadharau.

5 ^fKisha huwakemea katika hasira yake
na kuwaogopesha katika ghadhabu yake, akisema,

6 ^g“Nimemtawaza Mfalme wangu
juu ya Sayuni, mlima wangu mtakatifu.”

Ushindi Wa Mfalme

7 ^hNitatangaza amri ya Bwana:
Yeye aliniambia, “Wewe ni Mwanangu,
leo mimi nimekuzaa.

8 ⁱNiombe, nami nitayafanya mataifa
kuwa urithi wako,
miisho ya dunia kuwa milki yako.

9 ^jUtawatawala kwa fimbo ya chuma
na kuwavunjavunja kama chombo cha mfinyanzi.”

10 ^kKwa hiyo, ninyi wafalme, kuweni na hekima;
mwonyeke, enyi watawala wa dunia.

11 ^lMtumikieni Bwana kwa hofu
na mshangilie kwa kutetemeka.

12 ^mMbusu Mwana, asije akakasirika
nawe ukaangamizwa katika njia yako,
kwa maana hasira yake inaweza kuwaka ghafula.
Heri wote wanaomkimbilia.